Tag Archives: انٹربینک

کراچی – امریکی کرنسی کے مقابلے روپیہ تگڑا ہونے لگا، انٹربینک میں ڈالر کی قیمت دس ہفتے کی کم ترین سطح پر آگئی ہے۔ خفیہ اداروں کی جانب سے ڈالر کے ذخیرہ اندوزوں کے گھروں پر چھاپوں کی اطلاعات کے باعث منگل کو 20 ویں دن بھی ڈالر بیک فٹ پر رہا۔ ڈالر کے انٹربینک ریٹ 286 روپے سے نیچے آگئے جبکہ اوپن ریٹ گھٹ کر 286 روپے کی سطح پر آگیا۔ کاروباری ہفتے کے دوسرے روز انٹربینک میں امریکی کرنسی کی قیمت میں ایک روپے 4 پیسے کی کمی ہوئی جس کے بعد انٹربینک میں ڈالر 285 روپے 72 پیسے پر بند ہوا ہے۔ یاد رہے کہ گزشتہ کاروباری دن کے اختتام پر انٹربینک میں ڈالر 286 روپے 76 پیسے پر بند ہوا تھا۔ دوسری جانب اوپن مارکیٹ میں ڈالر بغیر کسی رد وبدل کے 286 روپے کی سطح پر برقرار ہے۔

کراچی – امریکی ڈالر کی روپے کے مقابلے میں کمی کا رجحان جاری ہے جب کہ پیر کے روز انٹربینک اور اوپن مارکیٹ میں ڈالر مزید سستا ہوگیا۔ مارکیٹ ذرائع کے مطابق گزشتہ ہفتوں سے جاری ڈالر کی قدر میں کمی کا رجحان نئے کاروباری ہفتے میں بھی جاری ہے۔ پیر کے روز انٹربینک میں ڈالر گزشتہ 6 ہفتوں کی کم ترین سطح پر آ کر 291 روپے کا ہوگیا۔ اسی طرح اوپن مارکیٹ میں بھی 4 ماہ کے بعد ڈالر 293 روپے کا ہوگیا۔ کرنسی ایکسچینج مارکیٹ میں کاروبار کے دوران ڈالر انٹربینک مارکیٹ میں اتار چڑھاؤ کے رجحان کے ساتھ 90 پیسے کی کمی کے ساتھ 290.86 روپے پر بند ہوا جب کہ اوپن مارکیٹ میں ڈالر کی قیمت روپے کے مقابلے میں 50 پیسے کم ہوکر 293 روپے کی سطح پر آ گئی۔ دوسری جانب پیر کے روز پاکستان اسٹاک مارکیٹ میں تیزی کا رجحان رہا۔

کراچی – ڈالر کی قدر میں گراوٹ کا سلسلہ جاری ہے۔ بدھ کے روز انٹربینک میں ڈالر کی قیمت مزید کم ہو گئی۔ کاروباری ہفتے کے تیسرے روز بھی انٹربینک میں ڈالر کی قیمت کم ہونے کا سلسلہ جاری ہے، جس کا آغاز 38 پیسے کمی سے ہوا اور ڈالر 299 روپے 50 پیسے کی سطح پر آ گیا، بعد ازاں گراوٹ کا سلسلہ جاری رہا اور دوپہر تک ڈالر کی قدر ایک روپے 15 پیسے کم ہوکر 298 روپے 73 پیسے کی سطح پر آ گئی۔ دریں اثنا اوپن مارکیٹ میں بدھ کے روز ڈالر کی قیمت میں ایک روپے کا اضافہ ہوا اور ڈالر 301 روپے کا ہوگیا۔ اوپن مارکیٹ میں گزشتہ ہفتے سے ڈالر کی قیمت میں کمی کا سلسلہ جاری تھا۔ دوسری جانب پاکستان اسٹاک ایکسچینج میں گزشتہ دنوں کی نسبت آج تیزی کا رجحان ہے۔ بدھ کے روز پی ایس ایکس میں 68 پوائنٹس کی تیزی کے ساتھ کے ایس ای 100 انڈیکس بڑھ کر 45577 پوائنٹس کی سطح پر آ گیا۔